Konsumi i energjisë elektrike në Kosovë këto ditë po arrin shifra maksimale deri në 1500 MWh, që është më e larta ndonjëherë që nga paslufta.
Ditëve të fundit disa qytete dhe fshatra të Kosovës po përballen me mungesë të ashpër të energjisë elektrike.
Lidhur me këtë sot kanë shkruar nga Instituti GAP.
Ky institut thekson se konsumi i energjisë elektrike në Kosovë këto ditë po arrin shifra maksimale deri në 1500 MWh, që është më e larta ndonjëherë që nga paslufta.
“Për shkak të një infrastrukture energjetike të vjetërsuar dhe me kapacitet të limituar, konsumi i lartë po shkakton ngarkesë në rrjet dhe prishje të numërta në të, dhe si rrjedhojë po shkaktohen edhe reduktime. Shto këtu faktin që në këtë periudhë, nevoja për import të energjisë elektrike mbetet po ashtu e lartë”, thuhet në reagim.
GAP thekson se konsumi është veçmas më i lartë në mëngjes dhe në mbrëmje, për çka është e nevojshme që qytetarët dhe bizneset të jenë të kujdesshëm dhe të ulin konsumin e energjisë elektrike në këtë periudhë.
“Njëkohësisht, një situatë e tillë duhet të shërbejë si thirrje për institucionet gjegjëse që të monitorojnë më afër dinamikën dhe realizimin e planit të investimeve të operatorëve në fushën e energjisë konform obligimeve që kanë, të rritet financimi publik për programet e efiçiencës së energjisë, etj”.
Kurse, gjatë ditës se djeshme, kompania KESCO u ka dërguar qytetarëve mesazhe, ku ka kërkuar që të kursehet energjia elektrike.
“Të nderuar konsumatorë, konsumimi i lartë po mbingarkon asetet tona, po rrezikon dëmtimin e tyre dhe ndërprerjen e energjisë. Ju lutemi, kurseni energjinë”, është thënë në mesazh e KECO-s.
Kurse, Ministria e Ekonomisë ka njoftuar se mbrëmë vonë ka mbajtur takim të përbashkët me KOSTT dhe KEDS për të trajtuar situatën e furnizimit me energji elektrike pasi që qytetarët e disa komunave të Kosovës kanë raportuar ankesa gjatë ditëve të fundit.
Ministria e Ekonomisë përmes një komunikate për media, bën të ditur se, KOSTT dhe KEDS kanë raportuar se, “me uljen e temperaturave, konsumi i energjisë elektrike ka arritur nivele shumë të larta, mbi 1400 MW në kohë të caktuara. Si rezultat, sistemi ynë elektro-energjetik është ngarkuar tej mase, duke shkaktuar vështirësi teknike në furnizim dhe duke e rrezikuar rrjetin; kësisoj, ka qenë e domosdoshme që operatorët të bëjnë shkyçje në disa vendbanime ku ngarkesa ka qenë e papërballueshme për rrjetin”
“Vështirësitë janë hasur veçanërisht në komunat e Ferizajt, Lipjanit, Gjakovës, Malishevës, Gjilanit, Shtimes, Istogut dhe Prizrenit, dhe si rrjedhojë mund të jenë ndikuar edhe disa nga vendbanimet të cilat furnizohen nga linjat e afektuara. Ndërsa, ekipet e KOSTT-it dhe KEDS-it janë duke punuar pandërprerë në terren për të minimizuar ndikimin në furnizim të qytetarëve”, thuhet në komunikatën e Ministrisë së Ekonomisë.
Tutje kjo ministri njofton se gjatë javës në vijim pritet të përfundohet ndërtimi i nënstacionit të tretë në Ferizaj nga KOSTT, që sipas tyre, pritet të zgjidh problemet me energji elektrike në këtë komunë.
“Lusim qytetarët që aty ku është e mundur të përdorin burime alternative për ngrohje si druri ose peleti, si dhe të zhvendosin konsumin e energjisë elektrike pas mesnatës”.
“Deri në 8 orë pa rrymë”, Kosova përballet me reduktime të ashpra të energjisë – Revista Monitor
Mungesa e energjisë ka nxitur reagime të shumta të opozitës, shoqërisë civile dhe qytetarëve.
Termocentralet “Kosova A” dhe “Kosova B”, që ndodhen në qytetin e Obiliqit, janë burimet kryesore të rrymës me anë të djegies së thëngjillit, ndonëse nuk i plotësojnë nevojat e shtetit, kryesisht për shkak të vjetërsisë.
Nevojat e Kosovës për energji elektrike i tejkalojnë kapacitetet e prodhimit, sidomos gjatë dimrit.
Kosova ka kapacitet të prodhojë rreth 800 megavate në orë, kurse nevojat e saj, në ditë dimri, arrijnë deri në 1.300 megavate në orë. Këtë diferencë, ajo zakonisht e importon nga jashtë.
Postimi ” Konsumimi i energjisë në Kosovë këto ditë më e larta që nga paslufta, deri në 1500 MWh ” eshte marre nga Revista Monitor.
