Banka e Shqipërisë ngelet optimiste se perspektiva e zhvillimeve të ekonomisë shqiptare mbetet pozitive.
Raporti i Politikës Monetare për tremujorin e dytë të vitit arrin në përfundimin se, në skenarin bazë, i ndërtuar mbi supozimin e një përfundimi të shpejtë të luftës në Lindjen e Mesme dhe normalizim gradual të çmimeve të naftës gjatë vitit të ardhshëm, aktiviteti ekonomik do të vijojë të rritet, ndonëse me norma më të ngadalta gjatë vitit 2026.
Po ashtu, inflacioni pritet të shënojë një nivel disi më të lartë krahasuar me parashikimet e mëparshme gjatë vitit 2026, por ai nuk parashikohet të shfaqë shmangie të ndjeshme në kahun e sipërm ndaj objektivit.
Megjithatë, në raport thuhet se materializimi i skenarëve më të rënduar të rrezikut do të shoqërohej me një rritje më të shpejtë të inflacionit dhe ngadalësim më të fortë të aktivitetit ekonomik.
Perspektiva e zhvillimeve ekonomike, si në nivel global ashtu edhe në Shqipëri, po fillon të ndikohet nga konflikti në Lindjen e Mesme dhe rritja e shpejtë e pasigurisë dhe e çmimeve të naftës që ka shoqëruar atë. Efektet e drejtpërdrejta të kësaj goditjeje kanë filluar të shfaqen në rritjen e inflacionit global.
Ndërkohë, efektet e tërthorta mbeten të vështira për t’u vlerësuar me saktësi, pasi ato do të varen nga një sërë faktorësh, ndër të cilët vendimtare mbeten kohëzgjatja dhe mënyra e zgjidhjes së konfliktit. Në kushtet e kësaj pasigurie, shumica e bankave qendrore kanë zgjedhur të mbajnë të pandryshuar qëndrimin e politikës monetare në mbledhjet e muajve mars e prill.
Rreziqet dominojnë perspektivën globale të rritjes ekonomike, megjithëse shkalla e ekspozimit ndryshon nga një ekonomi në tjetrën. Megjithatë, sipas Bankës së Shqipërisë, ekonomia shqiptare ka premisa inkurajuese për përballimin e kësaj goditjeje, me kosto të ulët dhe pa dëme afatgjata.
Së pari, ekonomia shqiptare ka një ekspozim direkt të moderuar, si pasojë e peshës relativisht të ulët të naftës në shportën e konsumit dhe të rritjes së eficiencës së përdorimit të burimeve energjetike.
Së dyti, ajo përballet me këtë goditje nga një pozicion fillestar solid, i karakterizuar nga ekuilibra të shëndoshë makroekonomikë, rrjete të përmirësuara të sigurisë financiare dhe pritje më të stabilizuara për të ardhmen. Këto premisa u ofrojnë politikave makroekonomike hapësira të shtuara për administrimin e goditjes.
Në skenarin bazë, të ndërtuar mbi supozimin e një zgjidhjeje të shpejtë të konfliktit, Banka e Shqipërisë vlerëson se ndikimi i kësaj goditjeje në ekonominë shqiptare do të jetë i moderuar. Inflacioni pritet të mbetet pranë objektivit gjatë tre viteve të ardhshme, ndërsa rritja ekonomike pritet të ngadalësohet disi gjatë vitit 2026, por të qëndrojë pranë trendit të saj afatmesëm në dy vitet pasuese. Në këtë skenar, pasojat e goditjes do të jenë të dukshme më shumë në variablat nominalë se në ata realë.
Megjithatë, pasiguria rreth këtij parashikimi është e lartë, e kushtëzuar nga pasiguria në projektimin e zhvillimeve gjeopolitike. Në këtë kontekst, Banka e Shqipërisë po monitoron dy skenarë alternativë. Në rast se konflikti zgjat ose intensifikohet, duke shkaktuar ndërprerje të rëndësishme në zinxhirët e furnizimit global, edhe presionet inflacioniste do të intensifikohen, duke kërkuar reagim më të fortë të politikës monetare, ndërkohë që rritja ekonomike mund të ngadalësohet më ndjeshëm.
Nga ana tjetër, nëse situata stabilizohet shpejt dhe çmimet e energjisë kthehen pranë niveleve të para-krizës, efektet inflacioniste pritet të jenë të përkohshme dhe implikimet për ekonominë shqiptare dhe politikën monetare do të mbeten margjinale.
Në mbledhjen e këtij muaji, Këshilli Mbikëqyrës vendosi të mbajë të pandryshuar normën bazë të interesit në nivelin 2.5%.
Postimi ” BSH optimiste, ndikimi i krizës në Lindjen e Mesme në inflacion dhe rritje do të jetë kalimtar ” eshte marre nga Revista Monitor.
