Ndërsa Shqipëria përjetoi për disa muaj me radhë një seri sulmesh kibernetike, nënshkrimet elektronike të bizneseve mbeten pikëpyetja por edhe frika më e madhe, për shkak të sensibilitetit shumë të lartë që ato bartin me vete. Rrezik që Qeveria po e adreson përmes një ligji të ri për “Identifikimin Elektronik dhe Shërbimet e Besuara”, ndërkohë që vetëm pak javë më parë përcaktoi edhe paga të reja për stafit në varësi të AKSHI-t që kujdeset për to, të cilat shkojnë në rreth 10 mijë dollarë në muaj.
Qëllimi është është përcaktimi i kuadrit të nevojshëm ligjor për identifikimin elektronik të sigurt, nënshkrimin elektronik, vulat elektronike, dorëzimin e shërbimit elektronik të regjistruar dhe autentifikimin e faqeve të internetit, si dhe garantimin e nivelit të lartë të sigurisë për transaksionet elektronike në vend.
Projektligji sjell në skenë Ofruesit e Kualifikuar të Shërbimeve të Besuara, të cilët do të autorizohen nga AKCESK me qëllim parandalimin dhe minimizimin e ndikimit të incidenteve të sigurisë, si dhe informimin e palëve të interesuara mbi efektet e shkaktuara nga incidente të tilla. Këta ofrues, do të auditohen me shpenzimet e tyre, të paktën çdo 24 muaj, si dhe për çdo ndryshim të mundshëm në procesin e ofrimit të shërbimit, nga Organizmi i Testimit dhe Konfirmimit.
Neni 8 i projektligjit përcakton kushtet për identifikimin fillestar ku risi është metoda remote e identifikimit ose metodat e tjera të cilat ofrojnë një siguri ekuivalente me praninë fizike.
Risi tjetër janë kërkesat që duhet të përmbushin pajisjet e krijimit të nënshkrimeve elektronike të kualifikuara të përcaktuara në nenin 27, si dhe certifikimi i pajisjeve të krijimit të nënshkrimeve elektronike të kualifikuara të përcaktuara në nenin 28, certifikim i cili do të bëhet nga një organ publik ose privat, i akredituar nga Autoriteti Përgjegjës për Akreditimin në Republikën e Shqipërisë.
Lorenc Rabeta/
Burimi: ScanTv.
Ripublikimi mund të bëhet vetëm kundrejt citimit të autorësisë dhe burimit origjinal.
