Intervistë me Mirsad Haliti, Drejtor i Përgjithshëm i ProCredit Bank Shqipëri
Viti 2026 do të jetë kyç për sektorin bankar, ku fokusi do të kalojë nga rritja e shpejtë drejt rritjes së qëndrueshme dhe të përgjegjshme.
Mirsad Haliti, Drejtor i Përgjithshëm i ProCredit Bank Shqipëri, thotë se sfidat kryesore lidhen me ruajtjen e cilësisë së portofolit në një mjedis ekonomik më të pasigurt, menaxhimin e rrezikut, përmbushjen e kërkesave rregullatore, si dhe përshpejtimin e digjitalizimit.
Në këtë kontekst, sipas tij, bankat duhet të ruajnë disiplinë të fortë në huadhënie, të investojnë në teknologji dhe menaxhim rreziku, dhe njëkohësisht të mbështesin ekonominë. Ai nënvizon se sfida reale nuk është thjesht rritja, por rritja me përgjegjësi dhe stabilitet afatgjatë.
Z. Haliti thotë se, në një mjedis ekonomik dhe rregullator kompleks, përparësitë e bankës do të mbeten ruajtja e cilësisë së portofolit dhe përshpejtimi i transformimit digjital, me synimin afatgjatë për të qenë një bankë që e vendos përvojën mobile në qendër të shërbimeve të saj.
Si e vlerësoni ecurinë e aktivitetit të bankës suaj gjatë vitit të kaluar dhe cilat ishin zhvillimet më të rëndësishme për sektorin bankar?
Viti 2025 ka pasur zhvillime të shumta për ProCredit Bank Shqipëri, i karakterizuar nga fokusi i fortë në rritjen cilësore të portofolit, forcimin e bazës së klientëve aktivë dhe thellimin e digjitalizimit të shërbimeve bankare.
Strategjia e bankës për vitin 2025 ka synuar një rritje të qëndrueshme, duke ruajtur standardet e menaxhimit të rrezikut dhe qeverisjes korporative.
Në këtë kuadër, banka ka vijuar forcimin e pozitës së saj në treg dhe investimet në linjat strategjike: përmirësimi i vazhdueshëm i kanaleve digjitale, automatizimi i proceseve dhe zgjerimi i gamës së shërbimeve online, me qëllim rritjen e efikasitetit operacional dhe ofrimin e një vlere të shtuar për klientët tanë.
Si pjesë e këtij zgjerimi, në vitin 2025 kemi çelur edhe degën në Vlorë, në vijim të hapjes së disa degëve të reja në vitin paraardhës. Nuk mund të lë pa përmendur edhe një tjetër risi për të cilën jemi shumë krenarë, pagesat me Apple Pay.
Ishim ne që në korrik 2025 u bëmë banka e parë në tregun shqiptar që lançoi Apple Pay, duke u dhënë klientëve mundësinë të paguajnë menjëherë me telefon ose orë inteligjente. Ky hap forcon pozicionimin tonë si bankë që udhëheq inovacionin dhe përshpejton kalimin drejt pagesave moderne, të shpejta dhe të sigurta.
Në nivel sektori, një nga zhvillimet më të rëndësishme gjatë vitit ka qenë përshpejtimi i transformimit digjital, integrimi i Shqipërisë në zonën SEPA dhe përmirësimi i infrastrukturës së pagesave.
Këto zhvillime kanë kontribuar në rritjen e përdorimit të bankingut digjital dhe pagesave elektronike, si dhe në orientimin e bankave drejt modeleve më efikase të operimit, të mbështetura në teknologji.
Paralelisht, sektori bankar ka ruajtur stabilitet financiar dhe likuiditet të lartë, duke reflektuar një qasje më të kujdesshme ndaj rritjes së ekspozimeve dhe një vëmendje më të madhe ndaj cilësisë së aktiveve.
Ndërkohë që ka një thellim të digjitalizimit të produkteve dhe shërbimeve bankare, paralelisht, në dy vitet e fundit, po shohim edhe një rritje të numrit të degëve dhe punonjësve të sektorit bankar. Kur prisni të arrijmë në një fazë të reduktimit të pranisë fizike të bankave dhe zhvendosje në shkallë më të gjerë drejt bankingut digjital?
Edhe pse digjitalizimi i produkteve dhe shërbimeve bankare është thelluar ndjeshëm në dy vitet e fundit, kjo nuk e përjashton menjëherë nevojën për prani fizike të bankave.
Prania fizike e bankave mbetet ende e rëndësishme, veçanërisht për klientët individë dhe bizneset e vogla, të cilët kanë nevojë të vizitojnë bankën për këshillim bankar dhe financiar, duke përfshirë këtu marrjen e një kredie apo këshillimin për të gjetur planin më të përshtatshëm për ta për kursimet e tyre.
Rritja e numrit të degëve dhe punonjësve reflekton nevojën për të mbështetur rritjen e aktivitetit ekonomik dhe kërkesën për shërbime më të personalizuara.
Në fazën aktuale, sektori bankar po operon kryesisht në një model hibrid, ku kanalet digjitale mbulojnë gjithnjë e më shumë shërbimet standarde dhe transaksionale, ndërsa degët fokusohen më shumë në këshillim të personalizuar.
Ne, si bankë që prej më shumë se një dekade kemi përqafuar digjitalizimin dhe transformimin e degëve nga një model tradicional në qendra këshillimi, besojmë se kemi arritur t’u ofrojmë klientëve tanë atë që ata kanë realisht nevojë: komoditet dhe shërbime efikase.
Prej vitesh, klientët tanë përfitojnë nga një bankë që i ka investimet në teknologji në themel të zhvillimit të saj. Njëkohësisht, duke mbajtur gjithmonë në fokus përmbushjen e nevojave të klientëve, strategjia e ProCredit bazohet në një model hibrid, ku kanalet digjitale plotësohen nga prania fizike e degëve tona në qytetet kryesore të vendit.
Nëse kthehem te tregu, në këndvështrimin tonë, një reduktim më i dukshëm i pranisë fizike do të ndodhë gradualisht, në një horizont afatmesëm dhe jo si një proces i menjëhershëm.
Në vijim të një cikli konsolidimi që zgjati rreth një dekadë, në vitin 2026, numri i bankave tregtare aktive në Shqipëri pritet të rritet për herë të parë pas 20 vjetësh. Besoni se ndodhemi në fillimet e një cikli të ri zgjerimi të bankave në treg apo në afat të gjatë, sistemi bankar do t’i kthehet përqendrimit dhe konsolidimit?
Fakti që në vitin 2026 pritet një rritje e numrit të bankave tregtare aktive në Shqipëri, për herë të parë pas dy dekadash, tregon interes të ri për tregun bankar shqiptar dhe një perceptim pozitiv për potencialin e tij afatmesëm.
Nga këndvështrimi i digjitalizimit, kjo rritje lidhet edhe me shfaqjen e aktorëve të rinj dhe modeleve alternative të biznesit, si bankat digjitale apo fintech-et, të cilat e shohin tregun si të përshtatshëm për inovacion dhe rritje.
Megjithatë, në afat të gjatë, besojmë se sektori bankar do të vazhdojë të karakterizohet nga cikle konsolidimi, të nxitura nga kërkesat rregullatore, investimet në teknologji dhe nevoja për shkallë ekonomie. Zgjerimi dhe konsolidimi nuk e përjashtojnë njëri-tjetrin, por pritet të alternohen në varësi të kushteve makroekonomike dhe zhvillimeve strukturore të tregut.
Vitin e kaluar, Banka e Shqipërisë vendosi për herë të parë disa kufizime direkte në huadhënien për blerjen e pasurive të paluajtshme rezidenciale, por sërish kredia në këtë segment vazhdoi rritjen me ritme të larta. Si i vlerësoni rreziqet e lidhura me ekspozimin në tregun e pasurive të paluajtshme dhe si do t’i përballonte sektori efektet e një krize të mundshme në këtë treg?
Vendosja e kufizimeve direkte nga Banka e Shqipërisë për huadhënien rezidenciale përfaqëson një hap të rëndësishëm drejt forcimit të stabilitetit financiar, duke zhvendosur fokusin nga volumi drejt cilësisë së kreditimit.
Edhe pse kërkesa ka mbetur e fortë dhe kredia ka vijuar të rritet, sektori bankar ka hyrë në këtë fazë me pozicione më të forta kapitale dhe praktika më të përmirësuara të menaxhimit të rrezikut.
Rreziqet kryesore lidhen me luhatjet e çmimeve të pasurive të paluajtshme dhe përballueshmërinë e huamarrësve në një mjedis ekonomik më sfidues. Në këtë drejtim, kufizimet mbi tregues si LTV dhe DSTI ndihmojnë në disiplinimin e kreditimit dhe në reduktimin e rreziqeve të akumuluara.
Në rast të një korrigjimi të tregut, sektori pritet të përballojë efektet përmes politikave të kujdesshme të kreditimit, diversifikimit të portofolit dhe niveleve të qëndrueshme të kapitalit dhe likuiditetit.
Në ProCredit, fokusi mbetet te financimi i bizneseve produktive dhe investimeve të qëndrueshme që sjellin ndikim pozitiv ekonomik, mjedisor dhe social.
Cilat mendoni se do të jenë çështjet dhe sfidat kryesore për sektorin bankar për vitin 2026?
Viti 2026 do të jetë kyç për sektorin bankar, ku fokusi do të kalojë nga rritja e shpejtë drejt rritjes së qëndrueshme dhe të përgjegjshme.
Sfidat kryesore lidhen me ruajtjen e cilësisë së portofolit në një mjedis ekonomik më të pasigurt, menaxhimin e rrezikut, përmbushjen e kërkesave rregullatore dhe ESG, si dhe përshpejtimin e digjitalizimit. Në këtë kontekst, bankat duhet të ruajnë disiplinë të fortë në huadhënie, të investojnë në teknologji dhe menaxhim rreziku dhe njëkohësisht të mbështesin ekonominë. Sfida reale nuk është thjesht rritja, por rritja me përgjegjësi dhe stabilitet afatgjatë.
Për ProCredit Bank, viti 2026 është mbi të gjitha një vit i rritjes së qëndrueshme. Strategjia jonë fokusohet në mbështetjen e sektorëve kyç të ekonomisë, veçanërisht MSME-ve produktive, investimet e gjelbra dhe rritjen e efikasitetit operacional përmes një modeli hibrid që kombinon kanalet digjitale me këshillimin e specializuar.
Për ne, sfida reale nuk është thjesht të rritemi, por të rritemi me përgjegjësi, duke garantuar stabilitet afatgjatë, ndikim pozitiv dhe vlerë të qëndrueshme për klientët dhe ekonominë.
Gjithashtu, një objektiv shumë i rëndësishëm për ne është rritja e konsiderueshme e bazës së klientëve retail. Vitin e nisëm me prezantimin e një tjetër shërbimi të ri: hapjen e llogarisë 100% online për individët, e cila e thjeshton procesin, kursen kohë dhe na mundëson ta ofrojmë të gjithë ciklin e shërbimit për këtë segment tërësisht online.
Në një mjedis ekonomik dhe rregullator kompleks, përparësitë tona mbeten ruajtja e cilësisë së portofolit dhe përshpejtimi i transformimit digjital, me synimin afatgjatë që të jemi një bankë që e vendos përvojën mobile në qendër të shërbimeve të saj.
LEXONI EDHE:
Shtimi i bankave, cikël i ri apo tendencë kalimtare?
Postimi ” “Investimet në digjitalizim do të përmirësojnë përvojën e klientëve” ” eshte marre nga Revista Monitor.
